Hjá Birtunni geta börn og fullorðnir fengið almenna sálfræðiþjónustu, ráðgjöf og meðferð vegna hvers kyns vanlíðunar og álags.
Hjá Birtunni – sálfræðiþjónustu eru ekki gerðar athuganir á vitsmunaþroska barna/unglinga eða formlegar frumgreiningar á þroskafrávikum, ADHD eða einhverfu.
Það er þó sjálfsagt að mæta með slíkar spurningar í viðtal og fá raunhæfar upplýsingar um það hvort ástæða sé til þess að óska eftir slíkri athugun, hjá skólasálfræðingum/sjálfstætt starfandi sálfræðingum sem sinna slíkri greiningarvinnu.
Áhersla er á faglega og hlýlega þjónustu í samræmi við klínískar leiðbeiningar og viðurkennt verklag. Meðferðarleiðirnar sem Lauga notar og hefur þjálfun í eru hugræn atferlismeðferð (HAM), EMDR og DBR. Meðferðarleiðirnar eru mikið rannsakaðar og hafa sýnt fram á gildi sitt. HAMið (á ensku Cognitive Behavioral Therapy – CBT) er til í ýmiskonar útfærslum, fyrir ósértækan og sértækan vanda.
Þær meðferðarleiðir sem Lauga hefur sérstaka þjálfun í, umfram aðrar, eru:
Áfallamiðuð hugræn atferlismeðferð fyrir 3-18 ára (TF-CBT, eftir Cohen, Mannarino og Deblinger): til dæmis https://www.nctsn.org/interventions/trauma-focused-cognitive-behavioral-therapy
Val fyrir fjölskyldur; hugræn atferlismeðferð (AF-CBT), vegna harkalegra samskipta í fjölskyldum.
EMDR (Eye Movement Desensitization and Reprocessing) er heildstæð sálfræðileg meðferð sem var þróuð til að vinna úr afleiðingum áfalla.
DBR (Deep Brain Reorienting) áfallameðferð er líkamsmiðuð meðferðarnálgun sem hjálpar taugakerfinu að losa um sjokk og fyrstu viðbrögðin sem eiga sér stað í heilanum og líkamanum þegar slæmar upplifanir eiga sér stað., óháð því hvort langt eða stutt er síðan upplifunin átti sér stað. Þessi meðferð var sérstaklega þróuð til að vinna með tengslaáföll.
DBR-AT (Deep Brain Reorienting and Alexander Technique) er DBR meðferðin að viðbættri Alexanderstækni, sem snýst um að auðvelda og hraða losun sjokks úr taugakerfinu, með einföldum en áhrifaríkum æfingum.
Um fjarviðtöl
Á covid tímabilinu þróuðust fjarviðtöl fyrir sértækar meðferðarleiðir hratt og heilmargar rannsóknir hafa verið gerðar á gagnsemi þeirra. Þær benda í stuttu máli til þess að fjarviðtöl nýtist vel, eins og viðtöl á staðnum, til að bæta líðan skjólstæðinga, bæði barna og fullorðinna.
Meðferðarleiðirnar sem Lauga notar helst hafa verið aðlagaðar að fjarviðtölum og gagnsemi þeirra verið rannsökuð, hvort tveggja með góðum árangri.